Жўқорғи Кенгес Раиси «Меҳрли мактаб» филиали тарбияланувчиларини байрам билан табриклади
25.12.2024 Поделиться
Қорақалпоғистон Республикаси Жўқорғи Кенгесининг Раиси Аманбай Орынбаев Қорақалпоғистон тиббиёт институти клиникасидаги госпиталь турдаги «Меҳрли мактаб» филиалига ташриф буюрди.
Бу ерда даволаниб, таълим олаётган болаларни кириб келаётган Янги йил байрами билан табриклаб, юртимизда ҳар бир бола ҳурматли Президентимизнинг эътиборида ва ғамхўрлигида эканини таъкидлади ҳамда институт ректори О.Атаниязова билан биргаликда Президент совғаларини топширди.
Таъкидлаш жоизки, Қорақалпоғистон тиббиёт институти клиникасида «Замин» фонди томонидан «Меҳрли мактаб» филиали очилган эди. Шу асосда турли онкогематологик касалликлар билан касалланган, узоқ вақт давомида даволанишни ва парваришни талаб қиладиган, оддий мактаб ёки боғчага бориш имкони бўлмаган болаларнинг даволаниш билан бир вақтда таълим олиши ва тарбияланиши учун барча шароитлар яратилган.
Бу ерда онкогематологик патологияси бўлган болалар учун қулай синф хоналарида, махсус шароитларда ўқув жараёни олиб борилади. Улар реабилитация жараёнидан ҳам шу ернинг ўзида ота-оналари иштирокида ўтади.
Кўнгиллари қувончга тўлган болалар Янги 2025 йилдаги орзу-интилишларини билдирди. Бундан сўнг, байрамга кўрк бағишлаётган арча атрофида Қорбобо ва Қорқиз, турли эртак қаҳрамонлари иштирокидаги саҳналаштирилган томошалар йиғилганлар эътиборига тақдим этилди.