Qoraqalpog‘iston tibbiyot institutida Qoraqalpog‘iston Respublikasi Konstitutsiyasining 32 yilligiga bag‘ishlangan tadbir bo‘lib o‘tdi
03.04.2025 Поделиться
Bugun, 3-aprel kuni Qoraqalpog‘iston tibbiyot institutida Qoraqalpog‘iston Respublikasi Konstitutsiyasining 32 yilligiga bag‘ishlangan tantanali tadbir tashkil etildi. Tadbirda Qoraqalpog‘iston Respublikasi Jo‘qorg‘i Kengesining Sud-huquq va korrupsiyaga qarshi kurashish masalalari qo‘mitasi raisi A. Atajanov, Qoraqalpog‘iston Respublikasi Ma’muriy sudi raisi A. Nurlepesov, Qoraqalpog‘iston Respublikasi Prokuraturasi bo‘lim boshlig‘i A. Ergunusov, fakultet dekanlari, professor-o‘qituvchilar, talaba-yoshlar hamda ommaviy axborot vositalari vakillari ishtirok etdi.
Dastlab, O‘zbekiston va Qoraqalpog‘iston Respublikalarining davlat madhiyalari yangradi. Tadbirni institut rektori v.v.b. O. Xalimov ochib berdi va boshqarib bordi.
Tadbir davomida Konstitutsiyaning davlat taraqqiyoti, xalq farovonligi hamda demokratik huquqiy tizimni mustahkamlashdagi o‘rni alohida ta’kidlandi. Qoraqalpog‘iston Respublikasi Konstitutsiyasi 1993-yil
9-aprel kuni o‘n ikkinchi chaqiriq Jo‘qorg‘i Kengesning o‘n ikkinchi sessiyasida qabul qilingan bo‘lib, bugungi kunda mamlakatda amalga oshirilayotgan islohotlarning huquqiy poydevori hisoblanadi.
Qoraqalpog‘iston Respublikasi Jo‘qorg‘i Kengesi qo‘mita raisi A.Atajanov o‘z nutqida Konstitutsiyada belgilangan normalarning jamiyatimizdagi ahamiyati, ayniqsa, so‘nggi yillarda yoshlarning oliy ta’lim olish imkoniyatlarini kengaytirishga qaratilgan islohotlar to‘g‘risida so‘z yuritdi.
Shuningdek, institutning O‘zbek tili, tillar va ijtimoiy fanlar kafedrasi dotsenti T.Pirniyazova Konstitutsiyada inson huquq va erkinliklarining kafolatlari, shuningdek, ular asosida ishlab chiqilayotgan normativ-huquqiy hujjatlar haqida ma’ruza qildi.
Tadbir so‘ngida ishtirokchilar yig‘ilganlarni Qoraqalpog‘iston Respublikasi Konstitutsiyasi qabul qilinganining 32 yilligi bilan tabriklab, mamlakatda qonun ustuvorligini ta’minlash, yoshlarning huquqiy bilim va madaniyatini oshirish yo‘nalishida amalga oshirilayotgan ishlar borasida fikr almashishdi.
QTI Matbuot kotibi