Búgin, 13-fevral kúni Qaraqalpaqstan medicina institutında “Ilimpaz hayal-qızlar – itibarda”…
13.02.2026 ПоделитьсяBúgin, 13-fevral kúni Qaraqalpaqstan medicina institutında “Ilimpaz hayal-qızlar – itibarda” atamasında ruwxıy-aǵartıwshılıq ushırasıw shólkemlestirildi.
Ilajda instituttıń Pediatriya kafedrası baslıǵı A.Matkarimova, professor-oqıtıwshılar hám student-jaslar qatnastı. Ushırasıw dawamında ilimniń jámiyetlik rawajlanıwdaǵı sheksiz ornı, medicina tarawında pidákerlik penen miynet etip atırǵan ilimpaz hayal-qızlardıń turmıslıq hám ilimiy tájiriybesi, sonday-aq, jaslarǵa jaratılıp atırǵan keń imkaniyatlar haqqında hár tárepleme sóz etildi.
Ilajdı instituttıń hayal-qızlar máseleleri boyınsha rektor másláhátshisi Z.Erimbetova alıp bardı. Ol óziniń shıǵıp sóylegen sózinde hayal ilimpazlardıń jámiyet hám medicinanıń rawajlanıwındaǵı ornı, olardıń ilimiy potencialı, mártligi hám kásibine sadıqlıǵın ayrıqsha atap ótti. Sonday-aq, ustazlardıń bay tájiriybesi hám ilimiy jumısı studentlerge jaqınnan tanıstırıldı.
Ushırasıw ashıq pikirlesiw ruwxında ótip, studentler ózlerin qızıqtırǵan sorawlarǵa tolıq juwaplar aldı. Bunday ilajlar jas áwlad qálbinde ilimge muhabbat, ustazlarǵa húrmet hám hayal ilimpazlarǵa bolǵan itibardı jáne de bekkemlewge xızmet etedi.



