Jańalıqlar

Qaraqalpaq ádebiyatınıń eki ullı ǵayratkeri – Ibrayım Yusupov hám Tólepbergen Qayıpbergenovtıń 96…

05.05.2025

👁 2 marta ko‘rilgan

Qaraqalpaq ádebiyatınıń eki ullı ǵayratkeri – Ibrayım Yusupov hám Tólepbergen Qayıpbergenovtıń 96 jıllıǵına baǵıshlanǵan ádebiy kesheler Qaraqalpaqstan medicina institutında keńnen belgilenbekte.

Ózbekstan Qaharmanları, Ózbekstan hám Qaraqalpaqstan xalıq shayırı Ibrayım Yusupov hám Ózbekstan hám Qaraqalpaqstan xalıq jazıwshısı Tólepbergen Qayıpbergenovtıń tuwılǵan kúniniń 96 jıllıǵı múnásibeti menen instituttıń barlıq kafedralarında bayram ruwxında ádebiy kesheler shólkemlestirilmekte.

Atap aytqanda, Medicinalıq biologiya hám mikrobiologiya kafedrasında ótkerilgen ruwxıy-aǵartıwshılıq keshede jazıwshı hám shayırdıń biytákirar ómir jolı, bay ádebiy miyrası, jazǵan shıǵarmalarınıń teması hám milliy ádebiyatımızda tutqan ornı haqqında hár tárepleme maǵlıwmatlar berildi. Olar tárepinen dóretilgen qosıqlar hám prozalıq shıǵarmalar tiykarında saxnalıq kórinisler kórsetildi.

Keshede fakultet dekanı N.Gayıpbaev, Ibrayım Yusupov hám Tólepbergen Qayıpbergenov sıyaqlı úlken ádebiy shaxslardıń dóretiwshiligi jas áwladtıń tárbiyasında sheksiz áhmiyetke iye ekeni ayrıqsha atap ótildi. Ol studentlerdi ullı dóretiwshilerdiń shıǵarmaların oqıp, olardıń dóretiwshiliginen hám sóz ilhamınan zawıqlanıwǵa shaqırdı.

Ullı shayır hám jazıwshınıń esteligine arnalǵan bunday ilajlar Qaraqalpaqstan medicina institutındaǵı barlıq fakultet hám kafedralarda izbe-iz túrde ótkerilip, student-jaslar qálbinde ádebiyatqa bolǵan mehirdi jáne de bekkemlemekte.

PHP Code Snippets Powered By : XYZScripts.com