Ózbekstan Respublikası Konstituciyası qabıl etilgeniniń 33 jıllıǵına baǵıshlanǵan saltanatlı ilaj bolıp ótti
02.12.2025 Поделиться
8-dekabr – Ózbekstan Respublikası Konstituciyası qabıl etilgen kún múnásibeti menen Qaraqalpaqstan medicina institutında Bas nızamımızdıń 33 jıllıǵı keńnen belgilendi. Ilaj mámleketlik gimnlerdiń jańlawı menen baslandı hám institut rektorı O.Xalimov kiris sóz benen ashıp berdi.
Saltanatlı májiliste Joqarǵı Keńestiń agrar, suw xojalıǵı, tábiyattı qorǵaw hám ekologiya máseleleri komiteti baslıǵı A.Jumanazarov, Qaraqalpaqstan Respublikası Ishki isler ministri B.Torebekov, Joqarǵı sudınıń sudyası A.Saparov, institut dekanları, orınbasarları, professor-oqıtıwshılar, tyutorlar hám student-jaslar qatnastı.
Ilaj dawamında atap ótilgenindey, mámleketimizdiń tiykarǵı nızamı – Konstituciya insan huqıqları menen erkinliklerin qorǵaytuǵın, demokratiyalıq mámleket hám puqaralıq jámiyetin qáliplestiriwdiń bekkem huqıqıy tiykarı bolıp esaplanadı.
1992-jıl 8-dekabr kúni qabıl etilgen Ózbekstan Respublikası Konstituciyası xalqımızdıń áyyemgi mentaliteti hám úrp-ádetleri, zamanagóy demokratiyalıq principler, aldınǵı xalıqaralıq tájiriybeler tiykarında islep shıǵılǵan bolıp, ótken jıllar dawamında mámleket rawajlanıwınıń bas ólshemine aylanǵan.
Májiliste shıǵıp sóylegenler keyingi jıllarda mámleketlik basqarıwda nızam ústinligin támiyinlew, jańasha mámleketlik siyasattı qáliplestiriw, xalıqtıń huqıqıy mádeniyatın arttırıw boyınsha ámelge asırılıp atırǵan keń kólemli reformalardı joqarı bahalap ótti. Ásirese, 2023-jıl 30-aprel kúni ótkerilgen ulıwmaxalıqlıq referendum nátiyjesinde Konstituciyanıń jańa redakciyada qabıl etiliwi barlıq tarawlarda, sonıń ishinde, bilimlendiriw sistemasında túpkilikli ózgerisler hám jańalanıwlar ushın huqıqıy tiykar jaratqanı ayrıqsha atap ótildi.
Konstituciyada jaslardıń bilim alıwı, kásip-óner iyelewi, intellektuallıq hám ruwxıy jaqtan bárkamal bolıp jetilisiwi ushın zárúr principler belgilengen. Usı maqsette, Qaraqalpaqstanda joqarı oqıw orınları sanınıń artıwı, institutlardıń materiallıq-texnikalıq bazasınıń bekkemleniwi, qabıllaw kvotalarınıń kóbeytiliwi, ásirese, qosımsha grant orınlarınıń ajıratılıwı – Bas Nızamımızda belgilengen normalardıń turmıstaǵı ayqın kórinisleri bolıp esaplanadı.
Búgin elimiz jasları ilim, bilimlendiriw, mádeniyat, sport hám basqa da kóplegen tarawlarda erisip atırǵan jetiskenlikler mine usı imkaniyatlardıń nátiyjesi bolıp esaplanadı. Ilaj dawamında instituttıń Jaslar máseleleri hám ruwxıy-aǵartıwshılıq isleri boyınsha birinshi prorektorı Z.Aleuov Konstituciyanıń qabıl etiliw tariyxı, oǵan kirgizilgen ózgerisler, jańa redakciyanıń mazmun-mánisi hám onıń búgingi kúndegi áhmiyetliligi haqqında tolıq bayanat jasadı. Sonday-aq, Konstituciyada belgilengen principlerdiń bilimlendiriw sistemasında kórinip atırǵan ámeliy nátiyjeleri haqqında maǵlıwmatlar berildi.
QMIda ótkerilgen bul ilaj tek ǵana Konstituciya qabıl etilgeniniń 33 jıllıǵın múnásip belgilewge emes, al studentlerde Watanǵa sadıqlıq, nızamlarǵa húrmet hám huqıqıy mádeniyattı bekkemlewge xızmet etti.
QMI Baspasóz xatkeri