Student pikiri – bilim sapasınıń áhmiyetli ólshemi
23.01.2026 Поделиться
Búgin, 23-yanvar kúni Qaraqalpaqstan medicina institutında Ózbekstan Respublikası Prezidentiniń 2025-jıl 5-maydaǵı PP-76-sanlı Pármanınıń orınlanıwın támiyinlew maqsetinde Ulıwmamilliy studentler sorawnaması shólkemlestirildi.
Usı sorawnama arqalı studentlerdiń:
• bilimlendiriw procesiniń sapası,
• oqıtıw metodikası,
• professor-oqıtıwshılardıń kásiplik potencialı,
• oqıw-metodikalıq támiyinlew,
• sanlı bilimlendiriw resurslarınan paydalanıw,
• bahalaw sisteması hám institutta jaratılǵan sharayatlar boyınsha pikir hám usınısları úyrenildi.
Sorawnama ashıq-aydınlıq hám qalıslıq principleri tiykarında ótkerilip, onda instituttıń barlıq fakultet hám baǵdarlarında bilim alıp atırǵan studentler belsene qatnastı. Studentler óz pikir-usınısların erkin bildirip, bilimlendiriwdiń sapasın arttırıwǵa baylanıslı áhmiyetli usınısların alǵa qoydı.
Sorawnama nátiyjeleri oqıw procesin studentlerdiń mútájlikleri hám zamanagóy miynet bazarı talaplarına beyimlestiriw, oqıw rejeleri hám pán baǵdarlamaların jetilistiriw, sonday-aq, bilimlendiriw xızmetleriniń sapasın bunnan bılay da arttırıwda ayrıqsha áhmiyetke iye.
Ulıwma milliy studentler sorawnaması – studenttiń pikirin tiykarǵı ólshem sıpatında tán alıw, olardıń bilimlendiriw procesindegi qatnasın kúsheytiw hám joqarı bilimlendiriw sistemasın turaqlı jetilistiriwge xızmet etedi.
QMI Baspasóz xızmeti