Xalıqaralıq birge islesiw jolında áhmiyetli qádem
12.03.2026 Поделиться
Qaraqalpaqstan medicina institutında xalıqaralıq birge islesiwdi rawajlandırıwǵa qaratılǵan gezektegi áhmiyetli ushırasıw bolıp ótti. Onda institut rektorı Olimboy Xalimov hám Webster universiteti rektorı Dr. Jean Paul van Marissing qatnastı.
Ushırasıw dawamında eki joqarı oqıw orınları arasında bilimlendiriw hám ilimiy tarawlarda birge islesiwdi keńeytiwge qaratılǵan birge islesiw memorandumına qol qoyıldı. Ashıqtan-ashıq sóylesiw tárizinde ótken ushırasıwda xalıqaralıq bilimlendiriw perspektivaları, qospa akademiyalıq baǵdarlamalardı jolǵa qoyıw, professor-oqıtıwshılar hám studentler ushın jańa imkaniyatlar jaratıw máseleleri hár tárepleme dodalandı.
Atap aytqanda, institut klinikasında jumıs alıp barıp atırǵan qánigelerdiń bilim hám tájiriybesin arttırıw, professor-oqıtıwshılardıń akademik mobilligin támiyinlew, birgeliktegi ilimiy-izertlew jumısların shólkemlestiriw hám studentlerdiń xalıqaralıq bilimlendiriw baǵdarlamalarında qatnasıwın keńeytiw boyınsha pikir alısıldı.
Qol qoyılǵan memorandum Qaraqalpaqstan medicina institutında tayarlanıp atırǵan medicina kadrlarınıń bilim hám kónlikpelerin xalıqaralıq standartlar tiykarında rawajlandırıwǵa, sonday-aq, olardıń globallıq básekige shıdamlı qánigeler sıpatında qáliplesiwine xızmet etedi.
Bul birge islesiw eki tárepleme baylanıslardı bekkemlew, zamanagóy bilimlendiriw tájiriybelerin engiziw hám studentler ushın jańa imkaniyatlar jaratıwda ayrıqsha áhmiyetke iye.
