Жоқарғы Кенес Баслығы «Меҳирли мектеп» филиалы тәрбияланыўшыларын байрам менен қутлықлады
25.12.2024 Поделиться
Қарақалпақстан Республикасы Жоқарғы Кеңесиниң Баслығы Аманбай Орынбаев Қарақалпақстан медицина институты клиникасындағы госпитал түриндеги «Меҳирли мектеп» филиалына барды.
Бул жерде емленип, билим алып атырған балаларды кирип киятырған Жаңа жыл байрамы менен қутлықлап, елимизде ҳәр бир бала ҳүрметли Президентимиздиң итибарында ҳәм ғамхорлығында екенлигин атап өтти ҳәм институт ректоры О.Атаниязова менен бирге Президент саўғаларын тапсырды.
Айтып өтиў орынлы, Қарақалпақстан медицина институты клиникасында «Замин» фонды тәрепинен «Меҳирли мектеп» филиалы ашылған еди. Усы тийкарда түрли онкогематологиялық кеселликлер менен наўқасланған, узақ ўақыт даўамында емлениўди ҳәм күтимди талап ететуғын, әпиўайы мектеп ямаса бақшаға барыў имканияты болмаған балалардың емлениў менен бир ўақытта билим алыўына ҳәм тәрбияланыўына барлық шараятлар жаратылған.
Бул жерде онкогематологиялық патологиясы болған балалар ушын қолайлы класс ханаларында, арнаўлы шараятларда оқыў процесси алып барылады. Олар реабилитация процессинен де усы жердиң өзинде ата-аналары қатнасыўында өтеди.
Кеўиллери қуўанышқа бөленген балалар Жаңа 2025-жылдағы арзыў-нийетлерин билдирди. Буннан соң, байрамға сǝн берип турған шырша әтирапында Аяз ата менен Қарқыз, түрли ертек қаҳарманлары қатнасыўындағы саҳналастырылған тамашалар жыйналғанлар нәзерине усынылды.
