Hindstannıń Era universiteti delegaciyası Qaraqalpaqstanda boldı
16.09.2025 Поделиться
Usı jıldıń, 9-10-sentyabr kúnleri Era universitetiniń basqarıwshı direktorı Muhsin Ali Xan basshılıǵındaǵı delegaciya Qaraqalpaqstan Respublikasına keldi. Delegaciyanı Qaraqalpaqstan medicina institutı rektorı O.Xalimov kútip aldı hám instituttı jaqınnan tanıstırdı. Olar ózleri tárepinen medicina tarawı boyınsha jaratılǵan innovaciyalıq texnologiyalar hám zamanagóy oqıtıw metodikasın usındı. Sonday-aq, institutta jaratılǵan bilimlendiriw sharayatları menen de tanıstı.
Ushırasıw juwmaǵında eki tárepleme memorandumǵa qol qoyıldı. Onda tómendegi áhmiyetli baǵdarlar boyınsha birge islesiw názerde tutılǵan:
- akademiyalıq mobillikti jolǵa qoyıw;
- professor-oqıtıwshılardıń qánigeligin arttırıw;
- ilimiy izertlewlerde birge islesiwdi rawajlandırıw;
- seminar hám konferenciyalar shólkemlestiriw;
- ilimiy hám xalıqaralıq jurnallarda maqalalar basıp shıǵarıwǵa járdem beriw.
Sonday-aq, bilimlendiriw procesine 3D animaciyalıq metodlar tiykarında oqıtıw sistemasın engiziw rejelestirilmekte.
Bul birge islesiw tek ǵana Qaraqalpaqstan medicina institutında bilimlendiriwdiń sapasın arttırıwǵa emes, al xalıqaralıq ilimiy baylanıslardı bekkemlewge de úlken úles qosadı.
