Jaslar arasında náshebentlik hám psixotrop zatlar – sergeklik hám juwapkershilik talabı
12.02.2026 ПоделитьсяBúgingi kúnde jaslar arasında náshebentlik hám psixotrop zatlardıń tarqalıwı global mashqalaǵa aylanıp barmaqta. Bul illetler tek ǵana insan salamatlıǵına úlken zıyan jetkerip qoymastan, al jaslardıń ómiri hám keleshegin de qáwip astında qaldıradı.
Usı múnásibet penen 12-fevral kúni Qaraqalpaqstan medicina institutında “Náshebentlik hám psixotrop zatlar tarqalıwınıń aldın alıw aylıǵı” sheńberinde taraw wákilleri menen ushırasıw shólkemlestirildi.
Ilajda QR IIM operativ-izlew xızmeti jınayat izlew basqarması wákili A.Aljanov, QR Bajıxana basqarması wákili A.Berdibekov hám juwapker qánigeler qatnasıp, jaslar menen ashıq pikirlesti.
Qánigeler tárepinen jınayatshılıqqa qarsı gúresiw, huqıqbuzarlıqlardıń aldın alıw, xalıqtıń huqıqıy mádeniyatın arttırıw máseleleri hár tárepleme túsindirildi. Sonday-aq, Jınayat kodeksine muwapıq náshebentlik quralların hám psixotrop zatlardı nızamsız paydalanıw hám tarqatıw ushın jınayıy juwapkershilik belgilengeni atap ótildi. BMSh maǵlıwmatlarına bola, bul illet awır jınayatlar, shańaraqlardıń buzılıwı hám millet genofondına unamsız tásir kórsetpekte.
📌 Sońǵı jılları, ásirese 30 jasqa shekemgi jaslar arasında bunday jaǵdaylar artıp baratırǵanı profilaktika jumısların kúsheytiwdi talap etpekte.
🩺 Medicina studentleri ushın bul tema ásirese áhmiyetli.
Sebebi olar keleshekte tek ǵana nawqaslardı emleytuǵın shıpaker emes, al salamat turmıs tárizin úgit-násiyatlawshı, jámiyetti sergeklikke shaqırıwshı qánigeler bolıp jetisedi. Sonlıqtan studentler bunday processlerde belsendi bolıwı, profilaktikalıq úgit-násiyatlaw jumıslarında qatnasıwı hám salamat áwladtı qáliplestiriwge óz úlesin qosıwı zárúr ekenligi ayrıqsha atap ótildi.
Ilaj sońında temaǵa baylanıslı videorolik kórsetilip, studentler ózlerin qızıqtırǵan sorawlarǵa qánigelerden tolıq juwap aldı.







