JASLÍQ SHÍJAAT HÁM ILIMGE SADÍQLÍQ
12.11.2026 ПоделитьсяILIM MENEN ERISILGEN JETISKENLIK
Qaraqalpaqstan medicina institutınıń 5-kurs studenti Bahodirov Jonibek Bahodirovich ilimiy izleniwleri, xalıqaralıq kólemdegi jetiskenlikleri hám belsendi baslamaları menen qatarlasları arasında ayrıqsha ajıralıp turmaqta.
2022-jılı Emlew isi baǵdarına mámleketlik grant tiykarında qabıl etilgen Jonibek oqıw dawamında joqarı nátiyjelerdi qolǵa kirgizip, medicina pánlerine bolǵan qızıǵıwshılıǵın ámeliy jetiskenlikler menen kórsetip kelmekte.
Onıń eń áhmiyetli jetiskenliklerinen biri — 2024-jıl 26-noyabr kúni Tashkent qalasında ótkerilgen «Medicina sheberleri» IV xalıqaralıq medicinalıq-ámeliy kónlikpeler olimpiadasında Fundamental medicina baǵdarı boyınsha 1-orındı iyelewi boldı. Sonday-aq, 2024-jılı Úrgenishte ótkerilgen xalıqaralıq konferenciya sheńberindegi anatomiya jarısında «Eń dóretiwshi qatnasıwshı» nominaciyası diplomına miyasar boldı.
Jonibektiń ilimiy iskerligi de itibarǵa ılayıq. 2025-jıl 21-may kúni «Science and Innovation» xalıqaralıq jurnalında mektep oqıwshılarınıń ulıwma densawlıǵına turaqlı fizikalıq belsendiliktiń tásirine baǵıshlanǵan ilimiy maqalası járiyalandı. Ol hár qıylı ilimiy-ámeliy konferenciyalarda da óz maqalaları menen belsendi qatnasıp kelmekte.
2025-jılı institut kóleminde ótkerilgen «Jıl studenti» tańlawında ekinshi orındı iyelegen Jonibek 23-sentyabr kúni Qaraqalpaqstan medicina institutınıń «Jaslar akademiyası» basshısı etip tayınlandı. Usı jıldıń iyun ayında bolsa «Jıldıń eń qábiletli ilimiy izertlewshi studenti» nominaciyası boyınsha sıylıqlandı.
Jonibek Bahodirovtıń erisken nátiyjeleri medicina tarawında bilim hám izleniwler arqalı biyik shıńlardı baǵındırıw múmkin ekenligin kórsetedi. Oǵan keleshektegi ilimiy hám kásiplik iskerliginde jańa tabıslar tileymiz!