“Jawızlıqqa qarsı – aǵartıwshılıq penen”
16.02.2026 Поделиться
16-fevral kúni Qaraqalpaqstan medicina institutında “Jawızlıqqa qarsı – aǵartıwshılıq penen” ideyası tiykarında ruwxıy-aǵartıwshılıq ilaj bolıp ótti.
Ilajda jaslar arasında jınayatshılıq hám huqıqbuzarlıqtıń aldın alıw, terrorizmge qarsı gúresiw, ishki hám sırtqı qáwip-qáterlerge qarsı ideologiyalıq immunitetti bekkemlew máseleleri boyınsha hár tárepleme maǵlıwmatlar berildi.
Ushırasıwda instituttıń Jaslar máseleleri hám ruwxıy-aǵartıwshılıq isleri boyınsha birinshi prorektorı Z.Alewov, Din isleri boyınsha komitettiń Qaraqalpaqstan aymaqlıq basqarmasınıń wákilleri, hayal-qızlar máseleleri boyınsha jetekshi qánige X.Ibragimova, Muhammad al-Beruniy atındaǵı orta arnawlı islam bilim jurtı docenti Q.Mambetov hám instituttıń profilaktika inspektorı T.Qarlıbaeva qatnastı.
Ilaj dawamında jaslardı ádep-ikramlılıq hám fizikalıq jaqtan bárkamal etip tárbiyalaw, olardı zıyanlı ideyalardan qorǵaw, salamat dúnyaqarastı qáliplestiriw hám sapalı tálim-tárbiya sistemasın bunnan bılay da jetilistiriw máseleleri dodalandı.
Atap ótilgenindey, elimizde tınıshlıq hám turaqlılıqtı saqlaw, bárkamal áwladtı tárbiyalaw mámleketlik siyasattıń tiykarǵı baǵdarlarınan biri bolıp esaplanadı. Sebebi, Prezidentimiz Shavkat Mirziyoevtiń atap ótkenindey, jaslar – tek ǵana keleshegimiz emes, al búginimiz hám erteńgi kúnimizdiń sheshiwshi kúshi bolıp esaplanadı.
