Qaraqalpaqstan medicina institutı rektorınan MÚRÁJAT
07.01.2026 Поделиться
Áziz studentler, húrmetli ata-analar hám ustazlar!
Búgingi kúnde jaslarımızdıń ómiri hám keleshegine eń úlken qáwip – náshebentlik hám narkojınayatshılıqlar bolıp esaplanadı. Bul illet bir demlik “lázzet” emes, al turmıstı jemiriwshi, arzıw-ármanlardı joq etiwshi qáwipli duzaq bolıp tabıladı.
Tilekke qarsı, ayırım jaslar bilip-bilmey yamasa aldawlarǵa aldanıp bul jolǵa kirip qalmaqta. Ásirese, dárixanada islep atırǵan studentlerden psixotrop dáriler menen islesiwde nızamlı normalarǵa qatań ámel etiw talap etiledi. Bir ǵana qáte – úlken juwapkershilik hám turmısqa zıyan jetkeriwi múmkin.
Áziz studentler!
Siz – jurt keleshegi. Ózińizdi saqlań! “Bir ret sınap kórsem hesh nárse bolmaydı” degen gáp – eń úlken ótirik. Náshebentliktiń hár bir tamshısı – táǵdirdi jemiriwshi záhár.
Húrmetli ata-analar!
Perzentińizdiń qızıǵıwshılıqları hám ortalıǵınan xabardar bolıń. Mehir hám isenim – eń kúshli qorǵanıwshı.
Húrmetli ustazlar!
Jaslardı sergeklikke shaqırıw, olarǵa salamat turmıs jolın kórsetiw – siziń qolıńızda.
Birlessek – jeńemiz! Narko jınayatlarǵa qarsı ayawsız gúres alıp barayıq.
Salamat áwlad – biziń eń úlken baylıǵımız!
Qaraqalpaqstan medicina institutı
rektorı Xalimov Olimbay Ashirbaevich