Qaraqalpaqstan medicina institutında Qaraqalpaqstan Respublikası Konstituciyasınıń 32 jıllıǵına arnalǵan ilaj bolıp ótti
03.04.2025 Поделиться
Búgin, 3-aprel kúni Qaraqalpaqstan medicina institutında Qaraqalpaqstan Respublikası Konstituciyasınıń 32 jıllıǵına arnalǵan saltanatlı ilaj shólkemlestirildi. Ilajǵa Qaraqalpaqstan Respublikası Joqarǵı Keńesiniń Sud-huqıq hám korrupciyaǵa qarsı gúresiw máseleleri komitetiniń baslıǵı A.Atajanov, Qaraqalpaqstan Respublikası Hákimshilik sudınıń baslıǵı A.Nurlepesov, Qaraqalpaqstan Respublikası Prokuraturası bólim baslıǵı A.Ergunusov, fakultet dekanları, professor-oqıtıwshılar, student-jaslar hám ǵalaba xabar qurallarınıń wákilleri qatnastı.
Dáslep Ózbekstan hám Qaraqalpaqstan Respublikalarınıń mámleketlik gimnleri jańladı. Ilajdı institut rektorı w.w.a O.Xalimov ashıp berdi hám basqarıp bardı.
Ilaj dawamında Konstituciyanıń mámlekettiń rawajlanıwı, xalıqtıń abadanlıǵı hám demokratiyalıq huqıqıy sistemanı bekkemlewdegi ornı ayrıqsha atap ótildi. Qaraqalpaqstan Respublikası Konstituciyası 1993-jıl
9-aprel kúni Joqarǵı Keńestiń on ekinshi sessiyasında qabıl etilgen bolıp, búgingi kúnde mámlekette ámelge asırılıp atırǵan reformalardıń huqıqıy tiykarı esaplanadı.
Qaraqalpaqstan Respublikası Joqarǵı Keńesiniń komitet baslıǵı A.Atajanov óziniń shıǵıp sóylegen sózinde Konstituciyada belgilengen normalardıń jámiyetimizdegi áhmiyeti, ásirese, sońǵı jılları jaslardıń joqarı bilim alıw imkaniyatların keńeytiwge qaratılǵan reformalar haqqında aytıp ótti.
Sonday-aq, instituttıń Ózbek tili, tiller hám sociallıq pánler kafedrası docenti T.Pirniyazova Konstituciyada insan huqıqları menen erkinlikleriniń kepillikleri, sonday-aq, olar tiykarında islep shıǵılıp atırǵan normativlik-huqıqıy hújjetler haqqında bayanat jasadı.
Ilaj sońında qatnasıwshılar jıynalǵanlardı Qaraqalpaqstan Respublikası Konstituciyası qabıl etilgeniniń 32 jıllıǵı menen qutlıqlap, mámlekette nızam ústinligin támiyinlew, jaslardıń huqıqıy bilim hám mádeniyatın arttırıw baǵdarında ámelge asırılıp atırǵan jumıslar boyınsha pikir alıstı.
QMI Baspasóz xatkeri