Qaraqalpaqstan medicina institutında salamat keleshek ushın áhmiyetli ilaj ótkerildi
01.12.2025 ПоделитьсяQaraqalpaqstan medicina institutında elimizde xalıqtıń salamatlıǵın qorǵawǵa qaratılǵan eki áhmiyetli baǵdar – Prezidenttiń “Xalıqtıń salamatlıǵın hám millet genofondın náshebentlik hám narkojınayatshılıqtan qorǵaw boyınsha kompleksli ilajlar haqqında”ǵı Pármanı hám 1-dekabr – Pútkil jer júzilik AIJSqa qarsı gúresiw kúni múnásibeti menen aǵartıwshılıq ilajı bolıp ótti.
Ilajda QR AIJSqa qarsı gúresiw orayınıń qánigeleri hám taraw wákilleri qatnasıp:
🔹 náshebentliktiń jaslar salamatlıǵına qáwipleri, onıń aqıbetleri hám aldın alıw ilajları;
🔹 AIV/AYJS infekciyasınıń tarqalıw sebepleri, juǵıw jolları hám eń nátiyjeli qorǵanıw usılları;
🔹 erte diagnozlaw hám óz waqtında emleniwdiń áhmiyeti haqqında hár tárepleme maǵlıwmat berdi.
Prezident pármanı millet genofondın qásterlep saqlaw, jaslardı zıyanlı illetlerden qorǵaw hám profilaktikalıq jumıslardı jańa basqıshqa alıp shıǵıwda áhmiyetli qádem sıpatında atap ótildi.
1-dekabr – Pútkil jer júzilik AIJSqa qarsı gúresiw kúni bolsa jámiyette sanalı múnásibet, keńpeyillik, medicinalıq sawatlılıq hám stigmaǵa qarsı gúresiw zárúr ekenligin jáne bir márte esletip ótti.
Institutimiz salamat turmıs tárizin úgit-násiyatlaw, studentlerde juwapkershilikli puqaralıq poziciyasın qáliplestiriw hám jámiyet salamatlıǵın bekkemlewge qaratılǵan jumıslardı izbe-iz dawam ettiredi.









