Qaraqalpaqstan medicina institutında zamanagóy bilimlendiriw hám ámeliyatqa itibar
24.01.2025 Поделиться
Húrmetli, Prezidentimiz reformalarınıń tiykarǵı maqsetlerinen biri — medicina tarawında joqarı mamanlıqtaǵı qánigeler tayarlaw bolıp esaplanadı. Onıń ushın joqarı oqıw orınlarında bilimlendiriw standartları jaqsılanıp, studentlerdiń ámeliy tájiriybesin arttırıwǵa itibar qaratıldı. Mámleket basshısı tárepinen jaratılǵan imkaniyatlardıń nátiyjesinde Qaraqalpaqstan medicina institutı búgingi kúnde joqarı texnologiyalı medicinalıq úskenelerden paydalanǵan halda oqıtıwdı jolǵa qoydı. Búgingi kúnde Institut zamanagóy hám innovaciyalıq usıllarǵa tiykarlanǵan oqıtıwdı ámelge asırıwda áhmiyetli qádemlerdi tasladı. Atap aytqanda, joqarı dárejedegi medicinalıq diagnostika hám medicinalıq járdem kórsetiw, Innovaciyalıq Simulyaciya orayın jaratıw arqalı búgingi kúnde studentler, klinikalıq ordinatorlar, magistrler hám shıpakerlerdiń ámeliy kónlikpelerin arttırıp kelmekte. Joqarı texnologiyalı medicinalıq úskeneler, zamanagóy simulyatorlar hám innovaciyalıq trening sistemaları ámeliyat processlerin nátiyjeli hám tabıslı alıp barıw ushın áhmiyetli qural esaplanadı. Sonday-aq, laparoskopik operaciyalar hám túrli keselliklerdiń diagnozin anıq hám sapalı etip qoyıwǵa imkan beriwshi trening simulyatorları da kiredi.
Aytıp ótiw orınlı, Qaraqalpaqstan medicina institutı Húrmetli Prezidentimizdiń baslaması menen jańa innovaciyalıq universitet klinikası dúzilgen edi. Usı tiykarda respublikamızda medicina tarawında kadrlardı tayarlawda klinika tiykarǵı bilimlendiriw bazası bolıp esaplanadı. Sońǵı 5 jıldıń ózinde institutqa 10 mln. dollardan artıq investiciya qarjıları tartıldı.
2024-jılı Yaponiya xalıqaralıq birge islesiw agentligi hám Institut rektorı Oral Ataniyazova menen birgelikte ámelge asırılǵan 7,3 mln. dollarlıq grant tiykarında QMI Universitet klinikasına zamanagóy medicinalıq ásbap-úskeneler járdeminde medicina xızmetkerlerin tayarlaw, qayta tayarlaw hám tájiriybesin arttırıwdıń nátiyjeli sistemasın qáliplestiriw, kadrlar potencialın arttırıw, klinikada aldınǵı medicinalıq metodlardı engiziw sıyaqlı iygilikli islerdi ámelge asırıwǵa bekkem tiykar jaratadı.
Joybardıń iske asırılıwı keń imkaniyatlarǵa iye jaratıp, ol jerde 100 den aslam medicina pánlerine baylanıslı ámeliy kónlikpelerdi arttırıw imkaniyatın berdi. Óz gezeginde Medicinalıq járdemniń sapasın arttırıw hám erte diagnozdı anıq hám tez qoyıw imkaniyatları jaratıldı. Bul bolsa, keleshekte medicina qánigelerin dúnya standartlarına juwap beretuǵın joqarı mamanlıq hám professional potencial menen tayarlaw imkaniyatın jarattı. Instituttıń bul innovaciyalıq joybarı medicina tarawındaǵı kadrlar tayarlawdıń jańa basqıshına alıp shıǵıwǵa xızmet etedi. Joybar arqalı studentler hám shıpakerler medicinalıq ámeliyattı zamanagóy texnologiyalar hám aldınǵı usıllar menen úyrenip, keleshekte Qaraqalpaqstannıń densawlıqtı saqlaw tarawında áhmiyetli qádem bolıp xızmet etedi.
Qaraqalpaqstan medicina institutı Baspasóz xatkeri
