QMI brigadası Moynaqta
15.03.2025 Поделиться
Qaraqalpaqstannıń eń shetki aymaǵı bolǵan Moynaq rayonındaǵı Qızıljar APJǵa 14-mart sánesinde Qaraqalpaqstan medicina institutı tárepinen shólkemlestirilgen medicinalıq brigada saparı oǵada úlken áhmiyetke iye boldı.
Bul sapardıń tiykarǵı maqseti — 14 jasqa shekemgi balalar hám hámiledar hayallardı medicinalıq tekseriwden ótkeriw, tuwma nuqsanı bar balalardı anıqlaw hám olardı Qaraqalpaqstan medicina institutı Klinikasına jiberiwden ibarat.
Medicinalıq brigada quramında QMI professorları, Klinikanıń tájiriybeli shıpakerleri, ordinatorlar hám joqarı kurs studentleri qatnastı. Sonday-aq, ilajda Yaponiya xalıqaralıq birge islesiw agentligi (JICA) tárepinen ámelge asırılǵan 7,3 million dollarlıq zamanagóy medicinalıq ásbap-úskeneler hám mobil klinikadan paydalanıldı.
Bul ilaj xalqımızdıń densawlıǵına bolǵan itibardıń joqarı dárejede ekenligin kórsetedi. Xalıq bul járdemnen sheksiz quwanıp, mámleketimizdiń insan qádirin ulıǵlaytuǵının hám xalıq ushın jaratılıp atırǵan keń imkaniyatlardan paydalanıp atırǵanın ańlap jetpekte.
