QMI rektorı studentler menen ashıq sáwbetlesti
19.02.2025 Поделиться
Qaraqalpaqstan medicina institutınıń w.w.a rektorı Olimbay Xalimov “Rektor hám jaslar” ushırasıwında student-jaslar menen ashıq pikirlesti.
Ásirese, Prezidentimizdiń jaslarǵa bolǵan ayrıqsha itibarı hám olarǵa bilimlendiriw tarawında jaratılǵan sharayatlar, medicina hám basqa da qánigelikler boyınsha imkaniyatlar haqqında ayttı. Prezidentimizdiń jaslarǵa qaratılǵan baslamaları sheńberinde hár jılı ótkeriletuǵın stipendiyalar, grantlar hám xalıqaralıq bilimlendiriw imkaniyatları jaslardıń joqarı sapalı bilim alıwına túrtki bolmaqta. Bul processler jaslardı óz imkaniyatların tolıq júzege shıǵarıwǵa hám mámleketimizdiń rawajlanıwına úles qosıwǵa iytermeleydi.
Institutta jaslardıń tálim-tárbiyası, olarǵa qosımsha qolaylıqlar jaratıw baǵdarında ámelge asırılıp atırǵan jumıslar haqqında maǵlıwmat berdi. Sonıń menen birge, instituttı hár tárepleme rawajlandırıw maqsetinde jaslardıń baslamaların tıńlaw hám qollap-quwatlawǵa tayar ekenligin bildirdi.
Ushırasıwda institut student-jaslarınıń ámelge asırıp atırǵan jumısların ǴXQda keńnen úgit-násiyatlaw maqsetinde media klub shólkemlestiriw, keń tarqalǵan keselliklerdiń sebeplerin túsindiriwge qaratılǵan videokontentler jaratıw, basqa wálayatlardaǵı medicina tarawındaǵı joqarı oqıw orınlarına sayaxatlardı shólkemlestiriw, studentler jataqxanasın iske túsiriw, sport dógerekleriniń jumısı ushın sharayatlar jaratıw hám materiallıq-texnikalıq jaqtan jaqsılaw boyınsha rektorǵa ózleriniń usınısların bildirdi.
Institut rektorı bildirilgen hár bir usınıs boyınsha tiyisli tártipte ámeliy jumıslar alıp barılatuǵının atap ótti. Jaslardı bárqulla elimizdiń rawajlanıwına úles qosatuǵın, joqarı potencialǵa iye medicina xızmetkerleri bolıp jetilisiwge háreket etiwden toqtamawǵa, studentlerdiń óz ústinde izlenip, qábiletleri, bilim hám kónlikpelerin arttırıp barıwǵa shaqırdı.
