QMIda studentlerge dóretiwshilik hám ilimiy maqala jazıw boyınsha seminar-trening
13.02.2025 Поделиться
Qaraqalpaqstan medicina institutında usı jıldıń 12-fevral sánesinde studentlerdiń dóretiwshilik jumısların rawajlandırıw maqsetinde “Dóretiwshilik hám ilimiy maqala jazıw” temasında seminar-trening shólkemlestirildi. Seminarǵa “Ustaz jolı” gazetası redakciyasınan J.Ótegenov, S.Saparova hám Z.Mambetniyazova hám Institut rektorınıń hayal-qızlar máseleleri boyınsha másláhátshisi Z.Erimbetova, Málimleme resurs orayı baslıǵı Q.Nawrızbaevalar qatnastı.
Seminar treningde, studentlerge gazetanıń búgingi turmısı, redakciya aǵzaları, olardıń wazıypaları, jańalıqlar hám xabarlar, publicistikalıq hám analitikalıq maqalalardı oqıwshılarǵa jetkeriw usılları, gazetanı basıp shıǵarıw procesi haqqında aytıp ótti. Gazeta hám jurnallardıń sociallıq tarmaqlar hám basqa da málimleme dáreklerinen ózgeshe túrde haqıyqatqa tiykarlanǵan hám puqta tallawǵa iye bolıwı zárúr ekenligine toqtaldı.
Búgingi kúnde sociallıq tarmaqlarda tarqatılıp atırǵan anıq emes maǵlıwmatlar, jalǵan xabarlar hám ótirik jańalıqlar jámiyette mashqalalardı keltirip shıǵarıwı múmkin ekenligin túsindirip, olardı anıqlaw hám filtrlewdiń áhmiyetin úyretti.
Seminarda, “Ustaz jolı” gazetasınıń iskerligi haqqında keńnen túsinik berildi. Atap aytqanda gazetada bayram sánelerine, ullı babalarımızdıń tuwılǵan kúnlerine baylanıslı tańlawlardıń da shólkemleskenligin óz gezeginde bolsa jeńimpazlarǵa “Ádiwli ustaz”, “Úmit shamshıraǵı” kókrek belgileriniń redakciya tárepinen tapsırılatuǵınlıǵı haqqında maqtanısh penen tilge alındı.
Haqıyqatında da búgingi kúnde ayrım basılımlardıń jabılıw aldında turǵanlıǵı, al “Ustaz jolı” gazetası óziniń oqıwshıların social tarmaqlar arqalı hám hár qıylı xoshametlewshi baslamalar menen ustaz hám zıyalılardıń auditoriyalarnıń súyikli gazetasına aylanıp atırǵanlıǵıda ıras.
Quwanıshlısı usınday tańlawlarda jeńimpaz bolǵan studentimiz G.Qalibayevaǵa “Úmit shamshıraǵı” kókrek belgisi studentler aldında tapsırıldı.
Sońınan, Instituttıń “Gigena hám qorshaǵan ortalıqtı qorǵaw” kafedrası assistenti S.Kadirbergenova Ilimiy maqala jazıw ushın tiykarǵı qaǵıydalar haqqında túsindirdi. Onda maqsetti belgilew, ádebiyat analizi, izertlew metodologiyası, nátiyjeleridi talqılaw juwmaq hám paydalanılǵan ilimiy ádebiyatlar, maqalalar, kitaplar hám basqa dereklerdi kórsetiw kerek ekenligin keń túrde túsindirdi.
Seminar sońında redakciya jámááti hám Institut elede tıǵız birge islesiwge boyınsha kelisip alındı. Bunday seminardı ótkeriwdiń tiykarǵı maqsetleriniń biri hayal-qızlardıń dóretiwshilik hám ilimiy jumısın qollap-quwatlaw, olar ushın imkaniyatlar jaratıw bolıp tabıladı.
QMI Baspasóz xatkeri