QARAQALPAQSTAN MEDICINA INSTITUTÍ XALÍQARALÍQ BIRGE ISLESIW KÓLEMLERIN KEŃEYTPEKTE.
09.10.2025 Поделиться
Qaraqalpaqstan medicina institutı xalıqaralıq kólemde ilimiy birge islesiw hám tájiriybe almasıw boyınsha jańa basqıshqa kóterilmekte. 2025-jıl oktyabr ayında Koryo universiteti menen ámelge asırılǵan jumıs – bunı ayqın tastıyıqlaydı.
Sapar hám seminarlar
Usı jıldıń 6-10-oktyabr kúnleri institutqa Qubla Koreya Respublikası Koryo universitetiniń professorı Lee Seung Gil keldi. Professor tárepinen zamanagóy ásbap-úskenelerdiń islew tártibi hám mexanizmlerine baǵıshlanǵan seminarlar hám de master-klasslar shólkemlestirildi. Ilajlar laboratoriya ámeliyatı hám texnik qánigeler ushın bahalı tájiriybe dáregi boldı.
Ushırasıwlar hám aldaǵı rejeler
Sapar sheńberinde institut rektorı Olimbay Xalimov hám professor arasında grant joybarları, qospa ilimiy izertlewler hám akademiyalıq mobillik máseleleri dodalandı. Ushırasıwda birge islesiwdi keńeytiw hám joybarlardı ámeliyatqa jiberiw boyınsha anıq qádemler belgilendi.
“Qorshaǵan ortalıq hám salamatlıq” joybarı sheńberindegi birge islesiw institutımız ushın ilimiy hám ámeliy potencialdı arttırıwda ayrıqsha áhmiyetke iye.
“Qorshaǵan ortalıq hám salamatlıq” joybarı
Qaraqalpaqstan medicina institutı hám Koryo universiteti arasında 2022-2028-jıllarǵa mólsherlengen “Qorshaǵan ortalıq hám salamatlıq” joybarı ámelge asırılmaqta. Joybardıń bahası 2,3 million AQSh dolların quraydı.
Joybardıń maqseti – institutta ilimiy-ámeliy hám teoriyalıq laboratoriya bazasın jaratıw arqalı ekologiyalıq salamatlıq máseleleri boyınsha bilimlendiriw hám izertlewlerdi rawajlandırıw bolıp tabıladı.
Akademik mobillik hám almasıw
Joybar sheńberinde akademiyalıq mobillik baǵdarlamaları jolǵa qoyılǵan: 2024-jılı Koreyadan 30 delegat institutqa kelgen, 2025-jıl 23-31-avgust kúnleri bolsa institut professor-oqıtıwshıları delegaciyası Koreyaǵa ámeliy sapar ámelge asırdı. Bul ret ilimiy prezentaciyalar, tájiriybe almasıw hám birgeliktegi joybarlardı rawajlandırıw imkaniyatın berdi.
Bul birge islesiwler institutımızǵa jańa bilim, zamanagóy texnologiyalar hám xalıqaralıq treningler alıp kelip, medicinalıq bilimlendiriw hám ilimiy izertlewlerdiń sapasın bunnan bılay da arttırıwǵa xızmet etedi.
