Balalarǵa Prezident sawǵaları tapsırıldı

25.12.2025

👁 10 marta ko‘rilgan

Búgin, 25-dekabr kúni Qaraqalpaqstan medicina institutı klinikasında balalarǵa quwanısh baǵıshlaǵan, mehir hám itibarǵa bay bayram ilajı bolıp ótti. Onda klinikada emlenip atırǵan hám “Mehrli mektep” te bilim alıp atırǵan balalarǵa Prezident sawǵaları saltanatlı túrde tapsırıldı.

Ilajǵa Qaraqalpaqstan Respublikası Joqarǵı Keńesiniń komitet baslıǵı M.Atamuratov, Mádeniyat ministri B.Temirbaev, institut rektorı O.Xalimov, sonday-aq, Sociallıq qorǵaw agentliginiń xızmetkerleri qatnastı. Miymanlar balalardı kirip kiyatırǵan Jańa jıl menen qızǵın qutlıqlap, hár bir bala mámleketimiz basshısınıń turaqlı itibarı hám ǵamqorlıǵında ekenin ayrıqsha atap ótti.

Bárshemizge belgili, Qaraqalpaqstan medicina institutı klinikasında “Zamin” fondınıń baslaması menen shólkemlestirilgen “Mehrli mektep” filialı nátiyjeli jumıs alıp barmaqta. Bul jerde uzaq múddet emleniwge mútáj, onkogematologiyalıq kesellikler menen gúresip atırǵan balalar emleniw menen bir waqıtta tálim-tárbiya alıw imkaniyatına iye.

️Balalar ushın qolaylı klass xanaları, arnawlı oqıw sharayatları jaratılǵan bolıp, bilimlendiriw procesi reabilitaciya menen únles halda, ata-analardıń qatnasıwında alıp barıladı.

🎄Bayram ilajı sheńberinde balalar Jańa 2026-jıl ushın arzıw-niyetlerin bildirdi. Shırsha átirapında Ayaz ata hám Qarqız, ertek qaharmanları hám sanlastırılǵan zamanǵa say saxnalıq kórinislerdiń qatnasıwındaǵı qızıqlı tamashalar balalarǵa umıtılmas bayram keypiyatın baǵıshladı.

PHP Code Snippets Powered By : XYZScripts.com