Qaraqalpaqstan medicina institutında – “Shayır hám jaslar” qızǵın ushırasıwı
28.08.2025 Поделиться“Áhmiyetli 90 kún” joybarı sheńberinde Qaraqalpaqstan medicina institutında “Shayır hám jaslar” ilajı bolıp ótti. Bul saparǵı ushırasıw kewillerde poeziyaǵa mehir oyattı.
️ Ilajdı instituttıń Ruwxıy-aǵartıwshılıq isleri bólim baslıǵı A.Ajiev ashıp, jaslar ushın bunday sóylesiwlerdiń turmıslıq sabaq bolatuǵının atap ótti.
✨ Ushırasıw miymanı – Ózbekstan hám Qaraqalpaqstan Jazıwshılar awqamı aǵzası, talantlı shayır R.Otarbaev boldı. Shayır studentlerge sóz óneri, poeziyanıń insan qálbin tárbiyalawdaǵı ornı haqqında jıllı pikirlerin bildirip, olardı dóretiwshilikke hám turmıslıq sabaqlarǵa shaqırıwshı qosıqları menen ilhamlandırdı:
Kóksińdi qalqan et dawıl, sellerge,
Tınıshlıq jarasar, abat ellerge,
Oyla, keleshekti batıp terlerge,
Watan ushın, millet ushın, xalıq ushın!
Ilaj dawamında studentler shayır menen ashıqtan-ashıq sáwbetlesip, ózlerin qıynap atırǵan sorawlarǵa juwap aldı. Ushırasıw jaslardıń qálbinde poeziyaǵa, ruwxıylıqqa, dóretiwshilikke bolǵan qızıǵıwshılıqtı jáne de kúsheytti.
🔹 Bunday qızǵın ushırasıwlar – dóretiwshilikke qushtar kewillerge suw quyadı, mánawiyatın bayıtadı hám óz jolın endi baslap atırǵan jaslar ushın ustazlıq másláhátler mektebine aylanadı.


