Qaraqalpaqstan medicina institutı studentleri xalıqaralıq kólemde joqarı nátiyjege eristi!
29.10.2025 Поделиться
Usı jıldıń 16-18-oktyabr kúnleri Qazaqstan medicina akademiyasında jas ilimpazlar hám studentlerdiń III Xalıqaralıq forumı bolıp ótti. Bul abıraylı ilaj sheńberinde ótkerilgen xirurgiyalıq pánler boyınsha III Xalıqaralıq olimpiadada Qaraqalpaqstan medicina institutı studentleri sıylı nátiyjelerdi qolǵa kirgizdi.
Atap aytqanda, “Desmurgiya” baǵdarındaǵı tańlawda institutımızdıń studentleri E.Abdimuratov, O.Artiqbaev hám R.Rzataevalar ózleriniń tereń bilimleri hám ámeliy kónlikpeleri menen ajıralıp turıp, II dárejeli diplomlar menen sıylıqlandı.
Bul tabısqa studentlerge ilimiy baǵdarda turaqlı basshılıq etip kiyatırǵan “Balalar xirurgiyası, travmatologiya, anesteziologiya hám reanimatologiya” kafedrası professor-oqıtıwshılarınıń miynetleri ayrıqsha. Studentlerdi, kafedranıń oqıtıwshıları G.Seidakova hám D.Tleuniyazovalar bashshılıq etip alıp barıp keldi.
Ilaj sońında, Qazaqstan medicina akademiyası rektorı Seytjanova Janna Serikjanovna tárepinen Qaraqalpaqstan medicina institutı rektorı Olimbay Xalimov atına minnetdarshılıq xatı tapsırıldı. Bul bolsa eki joqarı bilimlendiriw oqıw ornınıń arasındaǵı ilimiy birge islesiwdiń jáne de bekkemlenip atırǵanınan dárek beredi.
Quwanıshlısı, bul nátiyje – Qaraqalpaqstan medicina institutı jaslarınıń ilim, innovaciya hám xalıqaralıq maydandaǵı abırayın kórsetetuǵın joqarı nátiyjelerdiń biri esaplanadı.