Qıs máwsiminde student-qızlar jaǵdayı turaqlı itibarda
20.01.2026 Поделиться
Qıs máwsiminde hawa temperaturasınıń keskin tómenlewi jaǵdayında student-qızlardıń densawlıǵı, ruwxıy jaǵdayı hám oqıw procesine beyimlesiwin úyreniw maqsetinde Qaraqalpaqstan medicina institutında sistemalı jumıslar ámelge asırılmaqta.
Usı sheńberde institut Hayal-qızlar másláhát keńesi baslıǵı Z.Erimbetova, hayal-qızlar máseleleri boyınsha dekan másláhátshileri, psixolog hámde profilaktika inspektorları qatnasıwında studentler turaq jayında jasap atırǵan student-qızlar menen ushırasıw hám ashıq sáwbet shólkemlestirildi.
Ushırasıw dawamında student-qızlardıń densawlıǵı, ruwxıy jaǵdayı, keypiyatı hám jańa semestrdegi oqıw procesine beyimlesiwi boyınsha pikir-usınısları tıńlandı. Sonday-aq, olardı qızıqtırǵan sorawlar, bar mashqalalar hám usınıslar hár tárepleme dodalanıp, ámeliy usınıslar berildi.
Bunnan tısqarı, studentler turaq jayındaǵı jasaw sharayatları, xanalardıń jaǵdayı, órt hám texnikalıq qáwipsizlik qaǵıydalarına ámel etiliwi úyrenildi. Student-qızlarǵa xanalardı taza saqlaw, jeke hám ulıwma gigiena qaǵıydalarına ámel etiw boyınsha túsinikler berildi.
Institut basshılıǵı tárepinen student-qızlardıń abadanlıǵı, qáwipsizligi hám sapalı bilim alıwı turaqlı itibarda.
QMI Baspasóz xızmeti