Qaraqalpaqstan medicina institutında “Pitkeriwshi bakalavr – 2024” keshesi bolıp ótti
11.07.2024 Поделиться
Institut rektorı, professor Oral Ataniyazova jıynalǵanlardı shın kewilden qutlıqlap pitkeriw keshesin ashıp berdi.
Pitkeriw keshesinde Qaraqalpaqstan Respublikası Joqarǵı Keńesiniń komitet baslıǵı T.Romanov, Qaraqalpaqstan Respublikası Joqarǵı Keńes deputatı hám 1-sanlı ruwxıy xám nevrologiyalıq kesellikler dispanseri bas shıpakeri Z.Palwanova, institut professor-oqıtıwshıları hám pitkeriwshilerdiń jaqınları qatnasıp, bolajaq shıpakerlerdi qızǵın qutlıqladı hám aldaǵı mashaqatlı kǝsibinde áwmet yar bolıp, joqarı nátiyjelerge erisiwinde tilekleslik bildirdi.
Qaraqalpaqstan medicina institutı usı kúnge shekem hár jılı shıpakerlerdi jetilistirip kelmekte. Atap aytqanda institut Pediatriya isi boyınsha 28-jılı studentler pitkergen bolsa, Emlew isi baǵdarında 22, Joqarı miyirbekelik isi boyınsha 17, Mediko-profilaktika isi 15, Stomatologiya 8, Farmaciya boyınsha 3-jılı pitkermekte.
Quwanıshlısı joqarıdaǵı baǵdarlardıń sanı kóbeymekte. Yaǵniy usı jılı «Xalıq medicinası» baǵdarı boyınsha birinshi 20 pitkeriwshi oqıtıp jetilistirdi. Búgingi kúnge kelip tálim alǵan kadrlar tek ǵana respublika aymaǵında emes bálkim shet ellerde jumıs islep kelmekte.
Usı orında ayrıqsha atap ótiw tiyis, bıyılǵı pitkeriwshiler arasında Húrmetli Prezidentimiz Sh.Mirziyoevtiń Qaraqalpaqstan Respublikası jaslarına, sonıń ishinde Moynaq rayonı jaslarına qaratqan ayrıqsha itibarı nátiyjesinde institutımızǵa qosımsha kvotaları menen oqıwǵa qabıl etilgen jaslarda pitkerip shıqpaqta. Bul kvota tiykarında arqa rayonlar Moynaq, Taxtakópir, Karaózek, Bozataw hám Kegeyli rayonlarınan qabıllanǵan jámi 48 student-jaslar endi sol rayonlarǵa barıp 10 jıl jumıs islep beriw minnetlerin orınlaydı.
Jánede bıyılǵı pitkeriwshiler arasında tek ǵana Ózbekstan Respublikasınıń barlıq walayatları, Karaqalpaqstannıń jasları ǵana emes, sonıń menen birge Túrkmenstan Respublikasınan 6 pitkeriwshilerde bar ekenligin aytıp ótiw orınlı.
Keshede pitkeriwshilerdiń saltanatlı Ant beriw máresimi boldı. Sońınan, oqıw jılları dawamında sabaqlardı ózlestiriw kórsetkishi, jaqsı minez-qulqı hám ruwxıy-aǵartıwshılıq, jámietlik jumıslarda belsendiligi menen teńleslerine órnek bolıp kelgen ayrım pitkeriwshilerdiń ata-analarına QMI adminstraciyası atınan Minnetdarshılıq bildirildi.
Sonday-aq, ayrıqsha bahalar hám úlgili minez-qulqı, ilimge qızıǵıwshılıǵı, pidayılıǵı menen teńleslerine órnek bolıp pitkergen studentlerge Húrmet jarlıqları tapsırıldı.
QMI Baspsóz xatkeri