Institut rektorınıń bayram qutlıqlawı
07.03.2026 Поделиться
Húrmetli hám áziz apa-qarındaslar, húrmetli ustazlar, qádirli student-qızlar!
Sizlerdi báhárdiń eń gózzal áyyyamı — 8-mart, Xalıqaralıq hayal-qızlar kúni menen qızǵın qutlıqlayman.
Medicina tarawı – insan salamatlıǵı hám turmısı menen tikkeley baylanıslı bolǵan maqtanıshlı hám juwapkershilikli kásip. Bul jolda hayal shıpakerler, ustazlar hám student-qızlarımızdıń ornı ayrıqsha.
Sizler ózińizdiń mehriban qálbińiz, sabır-taqatıńız, bilim hám kásiplik sheberligińiz benen tek ǵana nawqaslardıń dártine shıpa bolıp qalmastan, al jámiyetimizde insanıylıq, miyrim-shápáát hám jaqsılıq qádiriyatların jáne de bekkemlep kelmektesiz.
Ásirese, institutımızda jumıs alıp barıp atırǵan hayal professor-oqıtıwshılarımız jas áwladqa bilim hám tájiriybe úlestirip, keleshek shıpakerlerdi tárbiyalawda múnásip úles qosıp kelmekte. Student-qızlarımız bolsa óziniń umtılısı, ilimge bolǵan qızıǵıwshılıǵı hám izlenisleri menen erteńgi kún medicinasınıń jetik qánigeleri bolıp kamalǵa kelmekte.
Búgingi kúnde elimizde hayal-qızlardıń bilim alıwı, ilim menen shuǵıllanıwı hám hár qıylı tarawlarda óz potencialın kórsetiwi ushın keń imkaniyatlar jaratılmaqta. Institutımızda da student-qızlarımızdıń ilimiy izleniwleri, ámeliy kónlikpeleri hám kásiplik rawajlanıwın qollap-quwatlawǵa ayrıqsha itibar qaratılmaqta.
Usı máwritten paydalanıp, siz – áziz hayal-qızlarǵa bekkem densawlıq, shańaraqlarıńızǵa qut-bereket, tınıshlıq hám abadanlıq tileymen. Sizlerdiń pidákerlik miynetińiz, shıpa beriwshi qollarıńız hám mehirge tolı qálbińiz bárqulla húrmet-izzetke ılayıq.
Jáne bir márte bársheńizdi 8-mart — Xalıqaralıq hayal-qızlar kúni menen qızǵın qutlıqlayman! Báhárgi keypiyat, jańa arzıw-niyetler hám jetiskenlikler sizlerdi tárk etpesin.