Qaraqalpaqstan medicina institutında IX Evropa kinofestivalı bolıp ótti
04.12.2024 Поделиться
Búgin institutqa Evropa Awqamınıń Ózbekstandaǵı elshisi Toyvo Klaar basshılıǵındaǵı delegaciya wákilleri keldi. Delegaciya wákilleri qaraqalpaq milliy dástúrlerine sáykes túrde kútip alındı. Sońınan, institut májilisler zalında ushırasıwdıń rásmiy ashılıw máresimi bolıp ótti.
Dáslep, institut rektorı Oral Ataniyazova keyingi jılları mámleketimizde bilimlendiriw tarawında ámelge asırılıp atırǵan keń kólemli reformalarǵa ayrıqsha toqtap ótti. Sonday-aq, Ózbekstannıń Evropa Awqamı menen joqarı bilimlendiriw sawda-ekonomikalıq, suw, energetika, transport hám mádeniy-gumanitarlıq tarawlardaǵı baylanısları kún sayın rawajlanıp atırǵanı hám bul perspektivalı birge islesiw bilimlendiriwde de ayrıqsha orın iyeleytuǵının atap ótti.
IX Evropa kinofestivalı sheńberinde Evropa Awqamınıń Ózbekstandaǵı elshisi Toyvo Klaar shıǵıp sóylep, bul festival Evropa Awqamı hám Ózbekstan arasındaǵı mádeniy baylanıslardı bekkemlew sonday-aq, Evropa kinematografiyasınıń hár túrliligin kórsetiw ushın úlken áhmiyetke iye ekenligin atap ótip, baǵdarlamadaǵı hár bir film tamashagóylerdi hám pútkil dúnya júzi adamların birlestiretuǵın haqıyqıy gúrrińler dúnyasına shaqıratuǵının ayttı.
Studentler, Evropa kinematografiyası tárepinen usınılǵan eki arnawlı film – «Ómir gózzal» hám «Urıs úsh hayal kóz qarasında» kórkem filmlerinen soń, Elshi menen studentler filmdi dodaladı. Miymanlar studentlerdiń pikirlerin tıńladı.
Bul kinofestivaldan gózlengen maqset Ózbekstan hám Evropa Awqamı arasındaǵı mádeniy baylanıslardı bekkemlew hám kino kórkem ónerinde erisilip atırǵan jetiskenlikler menen jaqınnan tanısıwǵa qaratılǵan.
