Qaraqalpaqstan medicina institutında “Ózbekstan – keńpeyil diyar” koncert baǵdarlaması bolıp ótti
18.03.2026 Поделиться
Búgin Qaraqalpaqstan Medicina institutında Milletleraralıq tatıwlıq kúnine baǵıshlanǵan “Ózbekstan – keńpeyil diyar” atamasındaǵı koncert ilajı tabıslı shólkemlestirildi. Ilajǵa instituttıń professor-oqıtıwshıları, student-jaslar, sonday-aq, jergilikli jámiyetshilik wákilleri qatnastı.
Ilajdı QMI rektorı Olimboy Xalimov ashıp berdi. Ol sózi dawamında kóp milletli xalqımızdıń ázelden qáliplesken tatıwlıǵı, óz-ara húrmet hám doslıq ortalıǵı jáne instituttaǵı tınısh hám dóretiwshilik ortalıq haqqında tolıq maǵlıwmat berdi. Rektor, sonday-aq, bunday ilajlardıń jas áwladtı keńpeyillik ruwxında tárbiyalawda úlken áhmiyetke iye ekenligin atap ótti.
Shıǵıp sóylegen Ministrler Keńesi Baslıǵınıń orınbasarı Alisher Allaniyazov búgingi kúnde Ózbekstanda alıp barılıp atırǵan mámleketlik reformalar, kóp milletli xalıqtıń tatıwlıǵı hám regionlardaǵı tınısh emes jaǵdaylarda tınıshlıqtıń áhmiyeti haqqında aytıp ótti. Ol, sonday-aq, kóp milletli xalıqtıń awızbirshiligi hám birlik ruwxın jáne de bekkemlew zárúr ekenligin atap ótti.
Koncert baǵdarlamasında student-jaslar túrli milletlerdiń milliy lipaslarında saxnaǵa shıǵıp, ráńbáreń úrp-ádetler, dástúriy ayaq oyınlar hám qosıqlardı kórsetti. Bul shıǵıp sóylewler tamashagóylerde umıtılmas tásir qaldırdı hám milletleraralıq doslıq hám keńpeyillik ruwxın jáne de bekkemlewge xızmet etti.
Ilajdıń tiykarǵı maqseti túrli millet wákilleri arasında tınıshlıq, tatıwlıq hám óz-ara húrmetti bunnan bılay da rawajlandırıwdan ibarat boldı. Búgingi kúnde Ózbekstanda túrli milletler bir shańaraqtay tatıw jasamaqta hám bunday mádeniy ilajlar olar arasındaǵı doslıq baylanısların bekkemlewge xızmet etedi.
Sonday-aq, koncert dawamında studentlerdiń qol miyneti menen tayarlanǵan kórgizbeler, milliy lipaslar hám saxnadaǵı dóretiwshilik shıǵıwlar hár bir xalıqtıń bay mádeniy miyrasın sáwlelendirdi. Ilaj sheńberinde dóretiwshilik shıǵıwlar arqalı bir-birin túsiniw hám qádirlew ortalıǵın qáliplestiriwge ayrıqsha itibar qaratıldı.
Bul ilaj Qaraqalpaqstan medicina institutı jámááti hám student-jaslarınıń kóp milletli mádeniyatqa húrmet penen qaraytuǵının, sonday-aq, jas áwladtı keńpeyillik hám awızbirshilik ruwxında tárbiyalawǵa qaratılǵan jumısın jáne bir márte tastıyıqladı.
QMI Bazpasóz xızmeti