Rásmiy múnasibet
04.07.2025 Поделиться
Sońǵı kúnlerde sociallıq tarmaqlarda “Qaraqalpaqstan medicina institutı oqıw imaratın joǵaltıw qáwpi astında” degen mazmundaǵı tiykarsız xabarlar keń tarqalmaqta. Bul maǵlıwmatlar haqıyqatqa tuwra kelmeytuǵının rásmiy túrde málim etemiz.
Qaraqalpaqstan medicina institutınıń bir oqıw imaratında Qaraqalpaqstan Ilimiy-ámeliy medicina akademiyasın shólkemlestiriw rejelestirilgen. Bul Akademiya zamanagóy talaplarǵa juwap beretuǵın:
🔹 Ilimiy-izertlew laboratoriyası,
🔹 Oqıw-simulyaciyalıq orayı sıyaqlı bólimlerdi óz ishine aladı.
Bul oray:
✅ Medicina joqarı, orta arnawlı hám professional bilimlendiriw mákemeleri studentleri hámde
✅ Medicina hám farmacevtika xızmetkerleri ushın ámeliy kónlikpelerdi qáliplestiretuǵın innovaciyalıq oqıw-simulyaciyalıq baza sıpatında jumıs alıp baradı.
Sonıń menen birge, Qaraqalpaqstandaǵı qánigelerdiń mamanlıǵın arttırıw hám qayta tayarlaw, olardıń kásiplik bilimleri hám ámeliy kónlikpelerin jetilistiriw boyınsha alternativ sistema jolǵa qoyıladı.
🔹 Bunıń nátiyjesinde Qaraqalpaqstan Respublikası xalqına kórsetiletuǵın medicinalıq járdemniń sapası hám nátiyjeliligi jáne de jaqsılanadı.
Sonı ayrıqsha atap ótiw kerek, Qaraqalpaqstan medicina institutı óz jumısın belgilengen tártipte, tolıq kólemde dawam ettirmekte. Studentler ushın oqıw procesi turaqlı hám úzliksiz tárizde shólkemlestirilgen.
📌 Temaǵa baylanıslı tolıq maǵlıwmat hám rásmiy túsinikler tez kúnlerde ótkeriletuǵın baspasóz konferenciyası arqalı beriledi. Konferenciyanıń ótkeriliw waqtı hám mánzili haqqında qosımsha maǵlıwmat beriledi.
Sociallıq tarmaqlarda tarqalǵan tastıyıqlanbaǵan, rásmiy emes maǵlıwmatlarǵa emes, al tek ǵana rásmiy dáreklerge súyeniw hám qalıs juwmaq shıǵarıwdı soraymız.
Qaraqalpaqstan medicina institutı Baspasóz xızmeti