“Repressiya qurbanları” muzeyine sapar
11.11.2025 Поделиться
Búgin, 11-noyabr kúni Qaraqalpaqstan medicina institutı rektorı Olimbay Xalimov, birinshi prorektor Z.Aleuov, komplaens qadaǵalaw bólim baslıǵı Q.Jamalov hám tyutorlar basshılıǵında belsendi student-jaslar Qaraqalpaq mámleketlik universiteti janındaǵı “Repressiya qurbanları” muzeyine bardı.
Bul sapardıń tiykarǵı maqseti – siyasiy repressiya jıllarında ayıpsız jınayatshı sıpatında járiyalanǵan, ómiri zorlıq penen kesilgen, millettiń rawajlanıwı ushın janın pidá etken ata-babalarımızdıń esteligin ulıǵlaw hám student-jaslardıń sanasında tariyxıy estelikti bekkemlew.
Ilaj dawamında studentler 1937-1953-jıllardaǵı jáne ótken ásirdiń 80-jıllarında ámelge asırılǵan siyasiy repressiyalar tariyxın sáwlelendiriwshi arxiv hújjetleri, tariyxıy fotosúwretler, jeke buyımlar, sud húkimleri hám qoljazbalar, sol dáwirdiń apatshılıǵın sáwlelendiriwshi siyrek ushırasatuǵın eksponatlar menen tanıstı.
Muzey xızmetkerleri tárepinen studentlerge óz xalqı, ana jurtı, milliy qádiriyatları jolında gúresken mıńlaǵan ilim, mádeniyat, siyasat hám ádebiyat ǵayratkerleriniń ayanıshlı táǵdiri haqqında tereń tariyxıy maǵlıwmatlar berildi.
Sapar dawamında institut rektorı O.Xalimov muzey shólkemlestiriwshileriniń mashaqatlı miynetin joqarı atap ótip: “Bul muzey hár bir jas ushın sabaq ornı. Tariyxtı bilgen áwlad ǵana keleshekte qátelerge jol qoymaydı,” – dep atap ótti.
Sonday-aq, rektor studentlerdi muzey fondın bayıtıwǵa, bar tariyxıy eksponatlar hám arxiv materialların jıynawda belsene qatnasıwǵa da shaqırdı.
Bul sapar etiw student-jaslardıń milliy maqtanıshın, watansúyiwshilik sezimlerin, tariyxıy ádillikke bolǵan húrmetin, ruwxıy oy-pikirin jáne de bekkemledi.
QMI Baspasóz xızmeti