Talaptan kelip shıǵıp jańa oqıw kursları hám baǵdarlamaları engiziledi
27.03.2025 Поделиться
Qaraqalpaqstan medicina institutında ǵalaba xabar qurallarınıń wákilleri ushın baspasóz konferenciyası shólkemlestirilip, onda institut rektorı wazıypasın waqıtsha atqarıwshısı O.Xalimov, oqıw isleri boyınsha prorektorı M.Qurbanazarov, Shıpakerlerdiń qánigeligin arttırıw hám qayta tayarlaw bóliminiń dekanı A.Matniyazovalar tárepinen instituttıń oqıw procesindegi jańalıqları, aldaǵı rejeleri tuwralı maǵlıwmatlar berildi.
Atap ótilgenindey, házirgi waqıtta institutta zamanagóy oqıw baǵdarlamalarına tiykarlanıp, studentlerge zaman talabına say medicinalıq bilimlerdi úyretiw ushın eń sońǵı texnologiyalar hám oqıw metodikalarınan paydalanılmaqta. Oqıw processlerin bilimlendiriwdiń global standartlarına beyimlestiriw ushın ilajlar jedel ámelge asırılmaqta.
Medicina hám farmacevtika tarawı boyınsha bilimlendiriwdi hám ilimiy jumıslardı jáne de rawajlandırıw, mámleketlik joqarı oqıw orınlarınıń akademiyalıq hám shólkemlestiriw-basqarıw erkinligin támiyinlew boyınsha ámelge asırılıp atırǵan reformalar tiykarında joqarı medicinalıq oqıw orınlarında kadrlar tayarlaw procesin jańa basqıshqa alıp shıǵıw, sonıń ishinde, oqıw baǵdarlamaların jetekshi sırt el joqarı oqıw orınları menen integraciyalastırıw, oqıw baǵdarlamaların dúziwde jumıs beriwshi kárxanalardıń wákillerin qatnastırıw, studentlerdiń oqıwında ámeliyatınıń úlesin kóbeytiw baǵdarında jumıslar alıp barılmaqta.
Atap aytqanda, qánigelik talapları tiykarında oqıw baǵdarlamalarınıń institut tárepinen dúziliwi, studentler tárepinen tańlanǵan pánlerdiń kirgiziliwi hám oqıw baǵdarlamaları hár jılı jańalanıp, ámeliyattaǵı jańalıqlardı engizip barıw buǵan mısal bola aladı. Oqıw procesiniń ámeliyat sabaqlarında zaman talabındaǵı oqıtıw usıllarınan paydalanıw, zamanagoy mulyaj, simulyatorlarda ámeliy kónlikpelerdi ózlestiriw ámelge asırıladı.
– Máselen, YAponiya mámleketiniń JICA, Germaniyanıń GIZ fondları, Qubla Koreya mámleketinen alıp kelingen laboratoriya úskeneleri hám Ózbekstan Respublikası Prezidentiniń 2017-jıl 20-apreldegi PQ-2909-sanlı qararı tiykarında alıp kelingen oqıw laboratoriyalı úskeneler studentlerdiń ámeliy tayarlıǵın támiyinlewde úlken áhmietke ie,-deydi M.Qurbanazarov.
Institutımızda tájiriybeli hám joqarı mamanlıqqa ie professor-oqıtıwshılar jumıs alıp baradı. Olardıń kópshiligi xalıqaralıq dárejede tájiriybege ie bolıp, studentlerimiz benen óz bilimlerin ortaqlaspaqta. Bilimlendiriw procesinde oqıtıwshı pedagoglardıń usınday bilimi, tájiriybesi úlken áhmietke ie. Bunnan tısqarı respublikalıq, sırt ellerdegi ilimiy-ámeliy konferenciyalarda qatnasıw arkalı tájiriybe almasıw, sırt elli qánigelerdi lekciya sabaqları, sheberlik sabaqların ótiwge tartıw jolǵa qoyılǵan bolıp, institutımızda Avstriya mámleketiniń Vena universiteti, Sankt-Peterburg mámleketlik pediatriya medicina universiteti, Qubla Koreyanıń Koryo universitetlerinen qánigeler lekciya sabaqların ótpekte.
Institutımızda 2900 ge shamalas student oqımaqta. Ámeliy kónlikpelerin arttırıw maqsetinde aymaqtaǵı iri medicina mákemelerinde olardıń ámeliyat ótewi támiyinlenbekte. Bul ámeliyatlar tek ǵana oqıw procesin nátiyjeli etiwi emes, al medicina tarawında bolajaq basshılar hám qánigelerdi tayarlawǵa xızmet etpekte. Studentlerdiń teoriyalık bilimlerin bekkemlew maqsetinde oqıw ámeliyatınan basqa jazǵı óndirislik ámeliyat ta engizilgen.
Házirgi waqıtta 15 ten aslam mámlekettiń joqarı oqıw orınları menen birge islesiw boyınsha shártnamalarımız bar.
Keleshekte medicina tarawınıń talaplarına muwapıq jańa oqıw kursları hám baǵdarlamaların engiziwdi rejelestirip otırmız. Ásirese, onlayn bilimlendiriw hám aralıqtan oqıtıw sistemaların keńeytiw rejelestirilgen. Keleshekte dúnyanıń TOP-300ge kiriwshi joqarı okıw orınlarınıń oqıw bagdarlamaları menen muwapıqlastırıw, jetekshi tájiriybelerdi engizip barıw názerde tutılǵan. Keleshekte biz óz institutımızdı medicina tarawındaǵı eń jetekshi oqıw orınlarınan birine aylandırıwdı maqset etkenbiz.
Baspasóz konferenciyasında qatnasıwshılar oqıwǵa kiriwde kvotalar sanın kóbeytiw máseleleri, mámleketlik grant arqalı jáne shártnama tiykarında oqıp atırǵan studentlerdiń jańa sistema boyınsha bilimleriniń bahalanıwında tanıs-bilislik sıyaqlı ushırasıwı múmkin bolǵan jaǵdaylar, emlew mákemelerinde shıpaker qánigelerdiń jetispewshiligi, sırt ellerdegi yamasa qońsı wálayatlardaǵı abiturientlerdiń bul jerge kelip oqıwǵa qızıǵıwshılıǵı hám basqa da máseleler boyınsha ózlerin qızıqtırǵan sorawlarǵa juwap aldı.
Á.Jiemuratov,
Qaraqalpaqstan xabar agentligi