Qoraqalpog‘iston tibbiyot institutida «O‘qituvchi va murabbiylar kuni» keng nishonlandi
1 oktyabr – mamlakatimiz ta’lim tizimida eng ulug‘ va e’zozlanadigan sanalardan biri, o‘qituvchi va murabbiylarning fidokorona mehnatini qadrlash bayramidir. Shu munosabat bilan Qoraqalpog‘iston tibbiyot institutida ham ko‘tarinki ruhda bayram tadbiri tashkil etildi.
✨ Tadbirda institut professor-o‘qituvchilari, rektorat a’zolari, dekanlar va faol talabalar ishtirok etdi. Bayramni institut rektori Olimboy Xalimov ochib berib, o‘qituvchilarni samimiy tabrikladi, ularning ta’lim-tarbiya yo‘lidagi fidokorona xizmatlarini alohida e’tirof etdi.
Qutlug‘ sana arafasida institutning Gigiyena va atrof-muhit, epidemiologiya kafedrasi o‘qituvchisi Dilbar Ataxanova Respublikamiz miqyosidagi bayram tantanasida «Vatan fidoyisi» ko‘krak nishoni bilan taqdirlangani tadbirda faxr bilan ta’kidlandi.
Bayram tadbiri davomida talaba-yoshlarning she’rlari, qo‘shiqlari va ijodiy chiqishlari ustozlarga bo‘lgan mehr va hurmatni yanada yorqin aks ettirdi. Samimiy qutlovlar, iliq so‘zlar va ko‘tarinki kayfiyat tadbirga o‘zgacha ruh bag‘ishladi.
Muxtasar aytganda, O‘qituvchi va murabbiylar kuni – ustozlarga bo‘lgan cheksiz ehtirom ifodasi sifatida, yoshlar qalbida ularga mehr-muhabbatni mustahkamlashda muhim ahamiyatga ega.
