«Qaraqalpaqstan medicina institutınıń Universitet klinikasında medicinalıq xızmetler sapasın jaqsılaw» maqsetinde Qaraqalpaqstan medicina institutında Yaponiya xalıq aralıq sheriklik agentligi (JICA) joybarınıń estelik tasın ornatıw dástúri bolıp ótti.
01.07.2024 Поделиться
Ózbekstan Respublikasında sońǵı waqıtlarda densawlıqtı saqlaw salasında keń kólemli unamlı ózgerisler ámelge asırılıp atır, bul jumıslar jáhán jámiyetshiligi tárepinen joqarı dárejede tán alınbaqta. Bunda medicinalıq xızmetlerdiń sapası hám qolaylıǵın asırıw, zamanagóy texnologiyalardı engiziw, normativ-huqıqıy bazanı bekkemlew, analıq hám balalıqtı qorǵaw, qánigelestirilgen medicinalıq járdemdi jetilistiriw, medicinalıq tálimdi rawajlandırıw hám kadrlar potencialın asırıw, tarawdı tolıq ózgertiwdiń ústin turatuǵın baǵdarları retinde belgilengen.
2019 -2025-jıllarda Ózbekstan Respublikası densawlıqtı saqlaw sistemasın rawajlandırıw konsepsiyasın ámelge asırıw boyınsha ilajlardıń mámleketlik baǵdarlaması qabıllandı. Elimizde joqarı texnologiyalı islep shıǵarıwlardı jolǵa qoyıw, medicinanı sanlastırıw, medicina tarawına innovciyalıq texnologiyalardı alıp kiriw, investiciya joybarların keńeytiw sıyaqlı qatar jónelislerde maqsetlı joybarlar ámelge asırılıp atır.
Qaraqalpaqstan Medicina institutınıń iskerligi ámelge asırılıp atırǵan reformalardıń jarqın úlgisi bolıp tabıladı. Institut rektorı, senator Oral Ataniyazova baslaması menen sońǵı 5 jıl ishinde institutqa 10 mln dollardan artıq investiciya qosıldı al bul, 120 mlrd swm ekvivalentin quraydı.
Bul joybarlardan biri Yaponiya húkimeti járdeminde Yaponiya xalıq aralıq sheriklik agentliginiń (JICA) “Qaraqalpaqstan medicina institutınıń Universitet klinikasında medicinalıq xızmetler sapasın jaqsılaw” ushın arnalǵan 7,3 mln dollarlıq joybarı bolıp tabıladı. Bul joybardıń maqseti Universitet klinikasında joqarı dárejedegi emlew-diagnostika járdemin támiyinlew, materiallıq-texnikalıq bazanı bekkemlew, Innovciyalıq simulyaciya orayın shólkemlestiriw arqalı studentler hám ordinatorlardıń, shıpakerlerdiń ámeliy kónlikpelerin jaqsılaw bolıp tabıladı.
Ol jergilikli xalıqqa qánigelestirilgen hám joqarı texnologiyalı medicinalıq járdem kórsetiwde, densawlıqtı saqlawdıń aldıńǵı usılları hám texnologiyaların engiziwge qaratılǵan, sonıń menen birge Qaraqalpaqstan Respublikasında medicinalıq kadrlar potencialın jetilistiriwge járdem beredi. Qaraqalpaqstan medicina institutı janındaǵı universitet innovciyalıq klinikası Ózbekstan Respublikası Prezidenti baslaması menen dúzildi. Ol Qaraqalpaqstanda medicina salasındaǵı qánigeler ushın tiykarǵı tálim bazası esaplanadı.
Bul joybar sheńberinde Yaponiya húkimeti 31 túrdegi úskenelerdi, sonday-aq xalıq aralıq standartlarǵa sáykes keletuǵın medicinalıq, laboratoriya, tálim úskenelerin klinikaǵa biypul berdi, studentler tárepinen ámeliy kónlikpelerdi ózlestiriw ushın Innovciyalıq simulyaciya orayı hám medicinalıq járdem kórsetiw ushın barlıq zárúr úskeneler hám apparatlar menen tolıqtırılǵan Mobil klinika shólkemlestirildi.
