XALIQARALIQ BIRGE ISLESIW ÁMELDE: SIRT ELLI ILIMPAZLAR STUDENTLERIMIZGE LEKCIYA HÁM SABAQLAR ÓTKERMEKTE
22.10.2026 ПоделитьсяQaraqalpaqstan medicina institutında xalıqaralıq birge islesiw baylanısların keńeytiw, bilimlendiriwdiń sapasın arttırıw hám student-jaslardıń zamanagóy medicinanıń jetiskenlikleri menen jaqınnan tanısıwı ushın keń imkaniyatlar jaratılmaqta.
Atap aytqanda, Qazaqstan Respublikasınıń abıraylı joqarı bilimlendiriw hám ilimiy-izertlew mákemeleriniń qánigeleri institutımızdıń studentlerine hár qıylı baǵdarlarda lekciyalar hám ámeliy sabaqlar ótkermekte.
Sonıń menen birge, S.D.Asfendiyarov atındaǵı Qazaq milliy medicina universiteti, M.A.Aytxujin atındaǵı Molekulyar biologiya hám bioximiya institutı, Genetika hám fiziologiya institutı jáne Xoja Axmed Yassawiy atındaǵı Xalıqaralıq qazaq-túrk universiteti wákilleri oqıw procesinde qatnaspaqta.
Sabaqlar sheńberinde studentler medicinalıq ximiya, biologiyalıq ximiya, onkologiya, ishki kesellikler hám endokrinologiya pánleri boyınsha bilimlerin bayıtpaqta. Sırt elli qánigeler 1-5-kurs studentleri, sonıń ishinde, “Emlew isi,” “Pediatriya isi” hám “Fundamental medicina” baǵdarlarında bilim alıp atırǵan jaslar menen tájiriybe almaspaqta.
Bunday akademiyalıq birge islesiw studentlerdiń teoriyalıq bilimlerin bekkemlew, medicina ilimleriniń áhmiyetli máselelerin tereńirek úyreniw hám xalıqaralıq ilimiy tájiriybeni bilimlendiriw procesine engiziwde úlken áhmiyetke iye.
Qaraqalpaqstan medicina institutı xalıqaralıq baylanıslardı izbe-iz rawajlandırıw, sırt el joqarı bilimlendiriw hám ilimiy-izertlew mákemeleri menen birge islesiwdi bekkemlew jáne bolajaq shıpakerlerdiń kásiplik potencialın arttırıw jolındaǵı jumıslardı dawam ettirmekte.



