Húrmetli student-jaslar!
06.11.2026 ПоделитьсяQaraqalpaqstan medicina institutında bilimlendiriw procesiniń ashıq-aydınlıǵın támiyinlew, ádillik hám nızamlılıq principlerine ámel etiw, korrupciyalıq jaǵdaylardıń aldın alıw áhmiyetli wazıypalardan biri bolıp esaplanadı.
Korrupciya — bilimlendiriwdiń sapasına, ádillik principlerine hám jámiyettiń rawajlanıwına unamsız tásir kórsetiwshi illet. Ásirese, bilimlendiriw mákemesinde korrupciyaǵa jol qoyılıwı jas áwladtıń bilim alıwǵa bolǵan isenimine, teń imkaniyatlar hám salamat báseki principlerine zıyan jetkeredi.
Sonlıqtan, hár birimiz korrupciyanıń hár qanday kórinisine mawasasız múnásibette bolıwımız, para beriw hám alıw, tanıs-bilislik, mápler soqlıǵısıwı sıyaqlı jaǵdaylarǵa jol qoymawımız zárúr. Studentler bilim hám potencialı menen bahalanıwı, hár qanday máselede nızamlılıq hám qalıslıq ústin bolıwı shárt.
Áziz student-jaslar! Sizlerdi óz huqıq hám máplerińizdi nızamlı jollar menen qorǵawǵa, korrupciyalıq jaǵdaylarǵa dus kelseńiz biypárwa bolmawǵa hám bunday jaǵdaylar haqqında tiyisli tártipte xabar beriwge shaqıraman. Jım-jırtlıq hám biypárwalıq korrupciyanıń dawam etiwi ushın tiykar jaratıwı múmkin.
Umıtpań, korrupciyasız bilimlendiriw — sapalı bilim, ádil bahalaw hám múnásip keleshek girewi. Hadallıqtı turmıslıq principke aylandırıw hár birimizdiń juwapkershiligimiz.
Keliń, institutımızda hadallıq, ashıq-aydınlıq hám ádillik principlerine tiykarlanǵan bilimlendiriw ortalıǵın birgelikte bekkemleyik!
Húrmet penen,
Qaraqalpaqstan medicina institutı
Jaslar máseleleri hám ruwxıy-aǵartıwshılıq isleri boyınsha birinshi prorektorı Zayir Aleuov