KORRUPCIYAǴA QARSI GÚRES — HÁR BIRIMIZDIŃ PUQARALÍQ MINNETIMIZ
31.10.2026 ПоделитьсяHúrmetli student-jaslar!
Korrupciya jámiyettiń rawajlanıwı, nızam ústinligi hám ádillik principlerine qatań qáwip tuwdıratuǵın illet bolıp esaplanadı. Ol tek ǵana mámleket hám jámiyettiń rawajlanıwına emes, al bilimlendiriwdiń sapasına, jaslardıń keleshegine hám insanlardıń óz-ara isenimine de unamsız tásir kórsetedi.
Qaraqalpaqstan medicina institutı jámááti korrupciyanıń hár qanday kórinisine mawasasız qatnasta bolıwdı óz jumısınıń áhmiyetli principlerinen biri dep biledi. Bilimlendiriw procesinde ashıq-aydınlıq, qalıslıq, nızamlılıq hám akademiyalıq hadallıqtı támiyinlew bárshemizdiń ulıwma juwapkershiligimiz bolıp esaplanadı.
Áziz studentler!
Sizlerden oqıw procesinde hadallıq hám ádillik principlerine qatań ámel etiwińizdi sorayman. Imtixan hám sınaqlarda joqarı nátiyjege tek bilim, miynet hám izleniw arqalı erisiwge umtılıń. Baha, imtixan nátiyjesi, qatnas, stipendiya yamasa basqa da bilimlendiriw processlerine baylanıslı máselelerde nızamsız máp usınıs etiw, pul yamasa basqa da materiallıq baylıq beriw hám bunday jaǵdaylarǵa sherik bolıwdan qatań tıyılıń.
Sonı umıtpań, para beriw de, para alıw da nızamǵa qarsi. Korrupciyalıq jaǵdaylarǵa biypárwa qaraw bolsa bunday illettiń dawam etiwine tiykar jaratıwı múmkin.
Eger sizden nızamsız túrde pul, sawǵa yamasa basqa da máp talap etilse yamasa korrupciyaǵa baylanıslı jaǵdaylarǵa gúwa bolsańız, bunday jaǵdaydı jasırmastan, belgilengen tártipte institut basshılıǵına yamasa wákillikli shólkemlerge múrájat etiwińizdi sorayman. Hár bir múrájat nızamshılıq sheńberinde kórip shıǵılıwı kerek.
Biz keleshekte xalıqtıń salamatlıǵı ushın juwapker bolatuǵın tájiriybeli shıpakerlerdi tayarlap atırmız. Shıpaker ushın kásiplik bilim qanshelli áhmiyetli bolsa, hadallıq, hújdan, juwapkershilik hám adamgershilik pazıyletleri de sonshelli zárúr. Búgin bilimlendiriw procesinde qáliplesken hadallıq principleri erteńgi kásiplik jumısıńızdıń bekkem tiykarı boladı.
Korrupciyaǵa qarsı gúresiw tek ǵana basshılıq yamasa juwapker xızmetkerlerdiń emes, al hár birimizdiń wazıypamız. Hadallıqtı tańlayıq, ádillikti qádirleyik hám korrupciyanıń hár qanday kórinisine mawasasız múnásibette bolayıq!
Húrmet penen,
Qaraqalpaqstan medicina institutı rektorı
Olimboy Xalimov