KÁSIP BAYRAMÍ KEŃ BELGILENDI
09.11.2026 ПоделитьсяQaraqalpaqstan medicina institutında 8-noyabr — Medicina xızmetkerleri kúni múnásibeti menen bayram ilajı shólkemlestirildi.
Ilajdı institut rektorı O. Xalimov ashıp berip, medicina tarawı wákilleriniń xalıq densawlıǵın saqlaw jolındaǵı pidákerlik miyneti, sonday-aq medicinalıq bilimlendiriw hám ilim-pándi rawajlandırıwǵa qosıp atırǵan úlesin ayrıqsha atap ótti.
Bayram ilajı dawamında institutta nátiyjeli xızmet atqarıp kiyatırǵan bir topar xızmetkerler, atap aytqanda, G. Kalenderova Ózbekstan Respublikası Densawlıqtı saqlaw ministrliginiń «Ózbekstan Respublikası densawlıqtı saqlaw aǵlashısı», B. Bayniyazova bolsa «Xalıq densawlıǵınıń posbanı» kókirek belgileri menen sıylıqlandı.
Sonday-aq, institutta kóp jıllardan berli nátiyjeli miynet etip kiyatırǵan, bilimlendiriw hám ilim-pán rawajlanıwına múnásip úles qosqan professor-oqıtıwshılarǵa da ayrıqsha húrmet kórsetilip, olarǵa eskertkish sawǵalar tapsırıldı.
Bayram baǵdarlaması xalqımız súygen saz-qosıqlar, milliy estrada kórkem óner sheberleriniń tikkeley atqarıwları menen dawam etti.
Ilaj medicina tarawı pidayılarınıń awır miynetine húrmet kórsetiw, olardıń kásiplik iskerligin múnásip bahalaw hámde jámáátte bayramlıq keypiyattı bekkemlewge xızmet etti.
