AZIZ PROFESSOR-O‘QITUVCHILAR VA TALABA-YOSHLAR BARCHANGIZNI MA’NAVIY-MA’RIFIY HAFTALIK DOIRASIDAGI TADBIRLARDA FAOL ISHTIROK ETISHGA CHORLAYMIZ!
17.10.2026 ПоделитьсяQoraqalpog‘iston tibbiyot institutining O‘zbek tili, tillar va ijtimoiy fanlar kafedrasi tashabbusi bilan O‘zbekiston Respublikasining “Davlat tili haqida”gi Qonuni qabul qilinganining 37 yilligi munosabati bilan 19–23-oktabr kunlari ma’naviy-ma’rifiy haftalik tashkil etiladi.
Haftalikdan ko‘zlangan maqsad — o‘zbek tilining nufuzi va mavqeyini yuksaltirish, talaba-yoshlarda ona tiliga hurmat va ehtirom tuyg‘usini mustahkamlash, ularning nutqiy madaniyati, ijodiy va intellektual salohiyatini rivojlantirishdan iborat.
📅 HAFTALIK DOIRASIDAGI TADBIRLAR DASTURI
🔹 DUSHANBA — “SAVODXONLIK SARI BIR QADAM”
Ommaviy diktant — talaba-yoshlarning imlo savodxonligi, yozma nutq ko‘nikmalari va davlat tilida to‘g‘ri yozish malakasini mustahkamlashga qaratilgan tadbir.
🔹 SESHANBA — “O‘ZBEK ADABIYOTI DURDONALARI”
She’riyat va adabiyot kechasi — o‘zbek adabiyotining mumtoz va zamonaviy namunalari, shoirlar ijodi hamda ona tilining betakror jozibasini targ‘ib etishga bag‘ishlangan ijodiy uchrashuv.
🔹 CHORSHANBA — “O‘ZBEK TILINI QANCHALIK BILASIZ?”
Til bilimi chellenji — talaba-yoshlarning so‘z boyligi, imlo va grammatik bilimlari, ibora hamda maqollarni qo‘llash mahoratini sinovdan o‘tkazuvchi intellektual bellashuv.
🔹 PAYSHANBA — “TIL VA TAFAKKUR EKRANDA”
Kino kechasi — o‘zbek tilidagi badiiy filmlar orqali milliy qadriyatlar, ma’naviyat, til madaniyati va adabiy til me’yorlarini targ‘ib etishga qaratilgan tadbir.
🔹 JUMA — “O‘ZBEK TILINING NUFUZI VA TARAQQIYOTI”
Davra suhbati — davlat tilining jamiyat hayotidagi o‘rni, o‘zbek tilining nufuzi va mavqeyini oshirish, yoshlar orasida nutq madaniyatini rivojlantirish hamda tilga oid dolzarb masalalarni muhokama qilishga bag‘ishlangan muloqot.